RAYON SPORTS WFC ISHOBORA KWANDIKA AMATEKA MURI CECAFA? INTEGO NI ITIKE YA CAF WOMEN'S CHAMPIONS LEAGUE

Ikipe ya Rayon Sports Women FC yinjiye mu rugendo rushya rwo gushaka itike izayihesha guhagararira akarere ka CECAFA mu CAF Women's Champions League, nyuma yo gushyirwa mu Itsinda A ry'amarushanwa azabera mu Rwanda kuva tariki ya 21 kugeza ku ya 31 Kanama 2026.

Aya marushanwa azahuza amakipe yabaye aya mbere iwayo mu bihugu byo muri CECAFA, aho buri kipe izaba iharanira kugera ku mukino wa nyuma no kubona itike y'igikombe gihuza amakipe yabaye aya mbere ku mugabane wa Afurika

 .

Rayon Sports WFC igiye gukina aya marushanwa ifite inyota yo gukora amateka, cyane ko mu mwaka ushize wa 2025 yasezerewe ku mukino wa nyuma itsinzwe na JKT Queens yo muri Tanzania igitego 1-0, bituma ibura amahirwe yo kwerekeza muri CAF Women's Champions League.

Uyu mwaka ariko ibintu bisa n'ibyahindutse. Nyuma yo kumenya ko u Rwanda ruzakira aya marushanwa, ubuyobozi bwa Rayon Sports bwahise butangira kongerera imbaraga ikipe, bugura abakinnyi bafite ubunararibonye ndetse bukomeza gutegura ikipe mu buryo bwose kugira ngo izitware neza imbere y'abafana bayo.

Mu makipe ashobora kuzagora Rayon Sports harimo Simba Queens yo muri Tanzania, imwe mu makipe akomeye muri Afurika y'Iburasirazuba, ndetse na Kawempe Muslim Ladies yo muri Uganda, isanzwe ifite ubunararibonye muri aya marushanwa.

Nubwo aya makipe afite amateka akomeye, Rayon Sports na yo izaba yiringiye ubufasha bw'abafana bayo n'umusaruro w'imyiteguro yakoze kugira ngo igere kure.

Ikindi gituma aya marushanwa aba aya ngombwa ni uko ikipe izabona itike ya CAF Women's Champions League izahabwa na CAF inkunga ya miliyoni 150,000 z'amadolari ya Amerika ($150,000), amafaranga afasha amakipe gukomeza kwiyubaka no kwitegura neza amarushanwa mpuzamahanga.

Uko amarushanwa ateye, amakipe azabanza gukina mu matsinda, hanyuma amakipe ya mbere muri buri tsinda hamwe n'ikipe ya kabiri izaba yaritwaye neza kurusha izindi abe ari yo akomeza muri 1/2 cy'irangiza.

Kubera ko aya marushanwa azabera mu Rwanda, abafana ba Rayon Sports bafite icyizere ko ikipe yabo ishobora gukoresha amahirwe yo gukinira imbere y'abafana bayo ikagera ku ntego yari yarabuze umwaka ushize.

Ese uyu mwaka Rayon Sports WFC izaseka nyuma yo kubura amahirwe ku munota wa nyuma mu 2025? Igisubizo kizamenyekana hagati ya tariki ya 21 na 31 Kanama 2026, igihe u Rwanda ruzaba rwakiriye amarushanwa ya CAF Women's Champions League CECAFA Qualifiers.

Byanditswe na Igiraneza Migisha Janviére