U RWANDA RWEGUKANYE UMWANYA WA GATATU MURI FIBA U18 WOMEN'S AFROBASKET QUALIFIERS

Ikipe y'Igihugu y'u Rwanda y'abangavu batarengeje imyaka 18 muri Basketball (U18) yasoreje amarushanwa yo gushaka itike ya FIBA U18 Women's AfroBasket 2026 yegukanye umwanya wa gatatu, nyuma yo gutsinda Tanzania amanota 64-60 mu mukino wo guhatanira uwo mwanya.

Iyi ntsinzi yaje nyuma y'uko u Rwanda rubuze amahirwe yo kugera ku mukino wa nyuma, rukaba rwaratsinzwe na Kenya amanota 78-74 mu mukino wa 1/2 cy'irangiza, umukino waranzwe n'ihangana rikomeye kugeza ku masegonda ya nyuma. Iryo tsindwa ryahise rikuraho amahirwe y'u Rwanda yo kubona itike yo kuzitabira Igikombe cya Afurika cya FIBA U18 Women's AfroBasket 2026.

Nubwo rwari ruvuye mu mukino wababaje benshi, abakinnyi b'u Rwanda bagaragaje umutima wo kudacika intege. Binjiye mu mukino wa Tanzania bafite intego imwe rukumbi yo gusoza amarushanwa neza no guhesha igihugu umwanya wa gatatu.

Uyu mukino waranzwe no guhangana hagati y'impande zombi, ariko u Rwanda rwakomeje kuyobora umukino mu bihe byinshi. Mu minota ya nyuma, abakinnyi b'u Rwanda bagaragaje ubwitange n'ubuhanga, bituma basoza batsinze Tanzania amanota 64-60, begukana umwanya wa gatatu.

Nubwo intego nyamukuru yari iyo kugera ku mukino wa nyuma no kubona itike ya Afurika itagezweho, uru rugendo rwasize icyizere ku hazaza ha Basketball y'abangavu mu Rwanda. Aba bakinnyi bagaragaje impano, ubwitange ndetse n'ubushake bwo guhatana ku rwego rwo hejuru, ibintu bitanga icyizere ko bazakomeza gutanga umusaruro mu marushanwa ari imbere.

Byanditswe na Igiraneza Migisha Janviére