Ibangarye asezeye umupira!
Umukinnyi w’inararibonye, Ibangarye Anne Marie, yatangaje ko asezeye gukina umupira w’amaguru nk’uwabigize umwuga nyuma y’imyaka 16 awitangiye, asiga amateka atazibagirana muri ruhago y’u Rwanda.
Ibangarye wakiniye AS Kigali Women Football Club n’andi makipe arimo Indahangarwa WFC, yanambaye umwambaro w’ikipe y’igihugu y’u Rwanda, aho yagaragaje ubuhanga n’ubwitange byamugize umwe mu bakinnyi bamenyekanye muri ruhago y’abagore.
Mu 2015, yaciye ibintu atsindira AS Kigali WFC ibitego bitatu mu mukino batsinzemo Rambura WFC ibitego 7-1, wabereye i Kucukiro. Mu 2018, yanditse amateka atsindira u Rwanda igitego cya mbere mu mukino rwanganijemo na Uganda ibitego 2-2 muri CECAFA yabereye i Kigali.
Nubwo asezeye mu kibuga, Ibangarye ntiyateye umugongo umupira burundu, kuko ateganya gukomeza gukora indi mirimo ijyanye na wo, ndetse akazareba uko yakomeza amasomo ajyanye n’ubutoza.
Ibangarye asize urugendo rw’imyaka 16 rwuzuyemo ibihe by’ingenzi, ibitego n’amateka azakomeza kwibukwa muri ruhago y’abagore mu Rwanda.
Byanditswe na Igiraneza Migisha Janviere